Kiribati in 2007

Aio bon tei Ikaatau bon karimwin Raamita.
E bungiaki Tei Ikaatau 26th Maati, 2007.
Iai au katautau bwa e na rikirake bwa te ataei ae na rangin ongotaeka ao man nanona ana reirei.

Natiu ae Ten Raamita kanga te ataei ae iai te wanawana irouna ma e bon rangin ni kabatia te kan roronga.

Tao tii ngaia anne ao tao n nang kabwarabwarai moa.

Ai tibwa 24 au ririki ni maiu ao i bon mamaeka nte mwakoro ae Temaiku, I bon iein ma Nei Maria ae kain Tamana, Tuvalu. Tiein n te ririki ae 2003 imwin okiu mai Biiti ngke i nako n reirei. Ngke iokira Tarawa ao ia manga nako n tia reirei i Morikao are mataniwi nte tai anne bon teuare Tionatan ae natin te Timraa ma ana kauoman ae Amoti ae buun Nei Tina anne inanon te ririki ae 2004 ao inanon te maan ae aki rangi ni maan ao ia manga mwakuri nte JSS Betio are mataniwi nte tai anne bon Anterea ae kain Nonouti i bon mena n te Maths and Science ao i bon tia reireinia kain te koraki teuana ao tekoraki uoua nte ririki ae 2005. Inanon te ririki ae 2006 oa ia manga tia reirei nte JSS TUC1 i Bikenibeu ara mataniwi bon teuare Ten Rokete ae Buun Nei Tewata e bon rangi ni kakukurei te mwakuri ma imwain banen te ririki anne ao ia manga nako America ni mwakuri nte NCL ao aran ara kaibuke bon Norwegian Sun. Iai kain Kiribati iai bwa Te Neneia ae kabaneaki bwa e taibaoa ara supervisor. E bon aki rangi ni maan ao iai manga oki bwa e taonai te aoraki nte kamwaitoro. Ngke i oki ao e bon taonai te nanokawaki ae bati ngkai e a bon toki au karekemwane ma i bon onimakina te Uea ibukin bwai ni kabane.

Inanon te ririki ae 2007 ao e manga reke au mwakuri n te Otintaai Hotel ae te House keeper
I bon rangi ni kukurei bwa e bon rangi n raoiroi au karekemwane ma inanon te tai ae aki maan ao e manga roko te reta nakoiu bwa n na motirawa bwa e aaki moa tau te mwane ibukin te post are i mena iai. E taonai te nanokawaki ae bati ngkai e a manga bua naba au karekemwane ao i bon tiku naba n onimakina te Uea bwa ngai te tia kakoroi bukin ara iango nako.

I tiku i rariki kain abau ni mwengana i Bikenibeu ao imwina ao tia manga nako Temaiku ike ia tiku iai ni karokoa e a manga reke ana iango Mwaneu ae Nei Erinna bwa e na manga ronai nakon au reirei nte USP i Teaoraereke. E bon rangi n taonai te kukurei ae bwati ao akea bwa iai manga reitanako au reirei. Toa ia toki ikai ma tia manga reitia n teken te tai